李克勤前晚年廿九在紅館開騷，與觀眾共迎大年初一，又邀請了「阿旺」郭晉安和劉德華等人助興，阿旺更多番譏笑梁榮忠曳曳，氣氛熱烈。克勤又特別帶同愛犬Peanut上台向觀眾拜年，希望各位觀眾狗年行大運。
李克勤前晚在紅館為一連八場《06得心應手演唱會》揭開序幕，更跨年唱至大年初一凌晨一時多，克勤的雙親、盧淑儀雙親、周慧敏和男友倪震等均有往捧場，四面台全場爆滿。但開騷不久，舞台上方的鐵架乍現火舌，幸旋即被工作人員救熄，有驚無險。
鬆章高手
「同雙方家長打牌都輸」
克勤的個唱舞台四四方方，他笑言像一張麻雀枱，他說：「麻雀枱可以促成生意同人生大事，如果同雙方家長打牌，鬆章會好易話為，所以我打親牌都輸，計落除笨有精。」為迎接狗年，克勤安排舞蹈員扮成多隻大狗增添氣氛，又特別帶了五個月大的金毛尋回犬Peanut出場，一人一狗穿上父子裝示人，克勤一聲：「up定。」Peanut即向觀眾做出恭賀請請動作，十分可愛。
其後克勤憶述愛犬Lucky去年病死，哽咽地說：「我十年前養Lucky，佢每晚都陪我瞓，舊年佢腎衰竭，愈嚟愈瘦，有一晚我錄影《殘酷一叮》接到女友電話，獸醫話最好打針畀佢走，我當時好唔開心，但重要錄影一個𠱁人開心嘅節目，都算係一件最慘事情。」當時工作結束後，克勤即飛車趕往見Lucky最後一面，他說：「我攞幾多個男歌手獎都冇可能換佢返嚟。」隨即送上一曲《你怎麼捨得我難過》，現場還播放其女友盧淑儀與Lucky的合照。
共迎狗年
華仔克勤狂收觀眾利是
至凌晨時分，已答允為克勤任伴郎的劉德華出場與過萬觀眾迎接狗年，華仔說：「我係吉祥物，你快啲叫我up定。」二人隨即在台中相擁，華仔又說：「你快啲祝我好似你咁攞男歌手獎後宣布嗰啲嘢（結婚）。」克勤便答：「但出年我冇辦法做你伴郎。」華仔說：「你儍啦，我唔會攞嗰啲嘢喺頒獎禮宣布。」二人其後一邊唱賀年歌一邊向觀眾派利是，亦有觀眾主動派利是給他們。
另一表演嘉賓郭晉安則以阿旺造型現身，受到台下觀眾熱烈歡迎，他甫出場便賣口乖恭喜準新郎克勤說：「我祝你添丁發財，三年抱兩，白頭到老。」逗得克勤送上大利是。
賤男被噓
阿旺：佢喺砵砵上曳曳
至於去年背着女友鍾麗淇與朱慧敏「車震」的梁榮忠，甫出場即噓聲不斷，有人更直呼他「賤男」，連阿旺亦作狀扮害怕忠仔，他說：「媽咪話佢曳曳。我知佢喺砵砵上曳曳，我同老婆仔係喺房曳曳。」為了阻止阿旺亂說話，忠仔馬上派利是給阿旺，並說：「過去嘅嘢抹咗佢。」克勤卻說：「唔係你話抹就抹，要睇你表現。」
其後阿旺又表示羨慕周杰倫拍電影《頭文字Ｄ》，想學飄移車技送豆腐，忠仔說：「羅家英一早都識，佢朝早返中國揼骨，夜晚同阿姐交人。」阿旺問車上的豆腐怎麼辦時，克勤即抵死地說：「阿姐啲豆腐一早俾家英哥食晒。」
三人還揶揄譚詠麟（阿倫）一番，阿旺說：「做校長年年二十五歲，又有個仔一齊去玩都幾好。」忠仔卻說：「佢壓力好大，唔可以俾人知佢同個仔去玩。」
完騷後，克勤在後台開香檳，他說：「雖然第一場有啲機器故障，但算好順利，我拉愛犬出場時，着錯高踭鞋，所以拉狗跳障礙物時，我跑時都有啲抽筋。」
採訪：馬建華 攝影：何國豪
