新年已至，好多老友出外旅遊，大部份人去北海道，Ｋ醫生夫婦去紐西蘭探訪老友，經紀Ｆ等話去曼谷日日做spa，鬆一鬆，賓架Ｐ太太就飛去倫敦陪愛女過年。咦！點解聽唔到老友記去美國嘅？經紀Ｆ話：「自九一一之後，去美國好煩，入境要打手指模，碰啱個移民官臭檔嘅，會問呢樣嗰樣，坐內陸機重煩，分分鐘俾人抽中作詳細檢查，除鞋搜身，你估冇地方去咩，去曼谷又平又好享受，唔知幾嘆。」
諗落舊年呢個時候，人在拉斯維加斯，叫做幾好玩，但代價不菲，酒店費用加上在賭場輸錢，有啲肉痛，今年留港休息，靜靜地諗吓狗年投資大計重好。
Ｐ太本來亦有此意，但新曆新年後接到在英國讀中六嘅愛女來電：「阿媽，我俾人呃咗，你要有心理準備。」Ｐ太當堂諗到最壞嘅情況，口震震咁問：「情形壞到點呀？」愛女於是講故事，原來係三個女同學被英國男人用掩眼法呃咗一百五十鎊，Ｐ太鬆一口氣：「唉吔，嚇死我，唔見錢好閒啫，買個教訓，以後會醒目啲。」聽到愛女唔開心，於是Ｐ太立即訂機票去倫敦，與乖女度周末兼年初一。
甚麼掩眼法呢？三位女生用張二十鎊買火車票，自動售票機食咗張二十鎊，冇車票走出嚟，於是三人搵人幫手。兩位英國斯文男士行埋嚟話：「呢三架售票機只認得五十鎊鈔票，咁啦，如果你哋有五十鎊，我幫你哋放入去就掂嘞。」香港女生以為英國人好老實，交出三張五十鎊紙畀男士放入售票機，點知又係冇車飛走出嚟，兩男士聳聳膊頭話：「對唔住，幫唔到你哋。」言畢揚長而去。Ｐ女算醒目，立即報警，警察嚟到，叫車站職員打開售票機，一睇，咦！裏面只有二十鎊鈔票，一張五十鎊都冇，佢哋嗰三張五十鎊紙究竟去咗邊？警察話：「相信係俾嗰兩個男人袋咗咯，返警署落口供啦！」Ｐ太話一啲英國人專打香港留英中學生嘅主意，特別係女生，英國嘅紳士風度，可遇不可求，撞到算你好彩。