薛凱琪（Fiona）日前手執毛筆，大筆一揮寫出「開開心心迎狗年」揮春，中文水準稍遜的她雖然寫到手震，但誠意可嘉，而且寫得出做得到，過年間除狂煲笑片自娛外，更預備萬元首派開工利是，人人有份、皆大歡喜。
薛凱琪的中文向來麻麻，但日前她不怕醜揮筆寫大字，震騰騰地寫出「開開心心迎狗年」揮春，祝願大家新一年開心快樂。
Fiona會在今個新年首派開工利是，讓身邊朋友和公司同事開開心心，皆大歡喜，暫時已預算花費約一萬大元，她笑說：「咁舊年搵錢多咗，同事亦真係幫我好多，所以今年會正式派開工利是，但過年冇收入兼且有支出，以前我好少去拜年，今年要積極啦，幫補吓。」
拍笑片尋突破
過年這幾天休息時間，Fiona會很開心，因為她會放縱地煎炸通吃，再加勁煲笑片，實行在家笑餐飽，她說：「我都驚自己忍唔到口會食到肥晒，過年啲食物真係好美味，嘩！年糕呀！年糕切片後唔好加蛋煎，幾件叠埋一嚿擺落口，唔煎炸嘅都唔食。」
弊在Fiona又要食又怕肥，稍後她將開拍馬偉豪執導的笑片，怕來不及減肥，她說：「我終於脫離苦情戲行列，有得拍笑片，我狗年願望想喺電影有突破，接呢部戲已經係新嘗試，所以我特登煲笑片，有得笑又學吓嘢。」
採訪：朱倬誼 攝影：葉君海
場地：ONEBAR
髮型：JoLaw/Mike@ILCOPLO
化妝：JessciaChan
服裝：ZUCCA