做咗新聞近半世紀嘅「傳媒教父」黃應士，獲任命為公共廣播服務檢討委員會主席後頻頻露面，人稱吉叔嘅黃應士大半世人喺無綫打工，近日竟然要接受「友台」亞洲電視訪問，面對外界指指點點，佢似乎愈戰愈勇。
吉叔喺亞視出現嘅歷史性鏡頭，噚晚喺亞視國際台播出，佢接受由秦家驄主持嘅《時事縱橫》訪問，問到佢有冇無綫股票，吉叔話五七年入行以來，一直堅持操守，以身作則唔買賣所服務傳媒機構股份，無綫上市時獲配股份都早已沽貨，一切投資事宜由老婆話事，佢唔過問，亦甚少睇無綫節目，寧願畀錢去收費電視台睇《滅罪鑑證科》（CSI）。
吉叔喺本港新聞界德高望重，佢接受訪問時又袋錢入後輩個袋，話記者唔應該以陰謀論去睇前廣播處長張敏儀被調走事件，因為無白紙黑字證明同兩國論有關，至於有線電視訪問台灣呂秀蓮，佢話無綫唔做，唔代表其他電視台唔可以做，呢個係編輯方針問題，與政治無關，港台無乜節目唔做得，除咗由無綫搞咗幾十年嘅香港小姐，因為公營電台搞選美值得商榷。
傳真︰2623-9278
電郵︰[email protected]