今日大年初一，八方先祝各位讀者新年行大運、打工仔升職加薪、做生意嘅一本萬利、讀緊書嘅就學業猛進，最後當然唔少得，希望香港早日有普選啦！今年度歲嘅氣氛真係幾好，唔少年宵攤檔都豬籠入水，好嘅開始係成功一半，希望發叔聽日求到支好籤啦。
傑哥對講機贈煲呔
聽咗老董咁多年嘅賀詞，今年輪到着到紅卜卜嘅煲呔同太太喺禮賓府講珍惜身邊人，算係有啲新鮮感。立法會啲政黨噚日就去晒港台嘅政黨論壇度同市民拜年，順便送禮物畀市民同煲呔。大狀黨梁家傑就話，要喺新一年送個對講機畀市民同煲呔，希望煲呔同市民搭通天地線。
前綫同民主黨就揀送揮春。卿姐揀咗「心想事成」同「萬事勝意」，希望今年可以達成市民要普選嘅心願，兩電一煤公共交通不再加價；達仔對揮春就係要政府「落實減稅、還政於民」。
民協馮檢基就送兩個柑，希望市民生活好似柑咁甜，政府就同市民分柑同味、開放政制，快啲有普選！兩大「保皇黨」民建聯同自由黨就好合拍，齊齊唔講政治，只講經濟，葉國謙搵咗隻用汽球扭成嘅狗，象徵香港經濟好似狗一樣咁生猛；張宇人就攞住束花，希望經濟百花齊放，全民就業！
達仔揀「不再猶疑」
啲政黨又憑歌寄意，揀咗幾首歌同市民分享。民主黨揀Beyond嘅「不再猶疑」（爭普選），民建聯就揀咗鄭伊健嘅「隨時候命」（第二梯隊隨時上位），自由黨選容祖兒嘅「我的驕傲」（代表香港嘅成就）。不過八方最鍾意係前綫揀嘅「IbelieveIcanfly」，因為呢首歌最令人鼓舞，睇個歌名就知點解啦！不過有網民睇嚟重好懷念老董，重幫佢模擬咗個腳痛康復嘅復出賀詞，睇落都幾好笑。讀者得閒都可以上去望望：
爆料熱線：29290000、27860099
報料傳真：26239278
報料電郵：[email protected]