以陳太為首嘅手袋黨，一向都被認定喺官場好有影響力，真係邊個拎住手袋，邊個都有手袋黨之嫌。所以廖秀冬就話自己唔敢拎手袋，費事俾人誤會喎。
不過，陳太退休多時，曾班子又漸見雛形，應該到另一個黨登場喇啩？冬冬就話，𠵱家官場係以男手袋黨為主喎。男人邊會拎手袋？叫佢哋做公事包黨就差唔多。
冬冬呢排俾九鐵煩到嘔血，梗係啦，煲呔𠵱家專攻民生同經濟，九鐵搞得唔好，分分鐘激嬲煲呔，冬冬又點敢掉以輕心。
原來嗰日九鐵被篤爆隱瞞事故之後，冬冬對於停唔停駛都諗過一陣，不過，諗落九鐵系統有預警，加上佢哋又做咗善後工作，所以都畀少少時間佢哋改過。
其實呢單嘢唔止令冬冬頭痕，九鐵職員都好心灰，有員工重直接打電話畀冬冬訴心聲，有人down到話想放棄唔做，冬冬都好擔心，所以即時拎埋生果去九鐵探班，補吓鑊，令班前線員工士氣好番啲。
爆料熱線：29290000、27860099
報料傳真：26239278
報料電郵：[email protected]