周潤發心水：《最愛女人購物狂》
「我會揀港產片睇先，新年梗係要睇喜劇啦！我會睇咗《最愛女人購物狂》先，睇吓啲女人點樣發癲買嘢，因為呢樣嘢拍出香港女人嘅實況，我太太都係鍾意買嘢㗎嘛，新年梗係要開心啦！跟住睇埋《春田花花同學會》同《霍元甲》，之後先至睇西片。」
古天樂心水：《魔幻王國》
「我最想睇《魔幻王國》，呢套戲我印象最深，因為我細個讀書時曾經用呢本書做習作，同埋我知以前拍過，今次重拍，加埋咁多特技，又係《魔戒》嘅幕後班底，所以最想睇。」
楊千嬅心水：《春田花花同學會》
「《春田花花》嘅海報裏面，每個演員都有唔同嘅扮相，個個都好得意，美術方面亦做得好好，好適合一家大細去睇，過新年我都會陪父母去睇戲，揀呢類戲睇會開心啲。《藝伎》唔係唔好，但係我想睇完部小說先至睇部戲，而且過年梗係想睇開心戲啦！」
郭富城心水：《霍元甲》
「我揀《霍元甲》，因為我本身鍾意李連杰，而且我對歷史故事好有興趣，特別係李連杰打功夫嘅場面，每次都有唔同嘅新招，好似跳舞一樣，每個舞步都唔同，千變萬化，呢樣嘢係最考武術指導同演員嘅功夫。」
容祖兒心水：《魔幻王國》
「我會第一時間睇咗《魔幻王國》先，呢部戲未上之前已經聽過佢個大名，呢部戲好似《魔戒》咁會有幾集，而且我啲朋友睇過部戲都話好得，據我所知裏面嘅畫面好靚，好值得睇。」
