舊年十一月底中國太空人費俊龍同聶海勝訪港，曾經掀起一陣熱潮，不過始終只係見到個人，對於想了解更多太空科技知識，可能唔及親身到內地一行。一直搞開生態環保嘅綠田園，今年諗到行多一步，搞咗個兼具生態、歷史同航天知識嘅內地旅行團，賣點係有機會參觀首次開放畀港澳同胞參觀嘅酒泉火箭發射基地，話唔定可以㩒吓發射掣㖭。
綠田園理事張熾標話，預算個團喺七至八月出發，去八日，但有待內地當局最後批核。
佢話，其實發射基地唔喺酒泉，而係近住酒泉、喺內蒙古自治區內嘅阿拉善盟，屆時團員會經過戈壁沙漠同埋西夏王朝遺址，實地睇吓沙漠點樣種髮菜，雖然可能辛苦啲，但佢話肯定值回票價。到時正值暑假，相信最啱一家大細齊齊旅遊兼學習。
爆料熱線：29290000、27860099
報料傳真：26239278
報料電郵：[email protected]