重有兩個星期就係渣打馬拉松，中大醫學院今年有二百四十個師生參加，打破歷年紀錄，攞咗渣打馬拉松嘅鼎力支持大獎。院長霍泰輝到時跑半馬，腦內科教授黃家星會跑全馬，院長話其實跑馬拉松最重要唔係比賽嗰日，而係平日嘅鍛煉。
霍教授話醫學院一向好注重運動，醫生有健康嘅身體好重要，否則好難日捱夜捱。跑開馬拉松同越野賽嘅五年級學生羅仲康話，雖然醫科生功課好忙，但跑步後個人都精神啲、好瞓啲，佢嘅目標係用三個小時內跑畢全馬。準醫生張志鍵就話跑步之後個人自信心都強好多。
跑咗多年馬拉松嘅霍泰輝奉勸啲年輕跑手，唔好咁好勝，前段放得太快後段就冇氣，長跑一定要保持穩定跑速；整形外科醫生彭志宏就因為太忙，只能喺半夜練跑。
傳真︰2623-9278
電郵︰[email protected]