送雞迎狗，煲呔噚日行完花市之後，政府上上下下今日開始收爐放假，萬大事過完年放完假再算，任命新任特首辦新聞統籌專員何安達同中央政策組顧問劉細良嘅事，相信煲呔會等到狗年先正式宣布。不過何安達Andy近日已四出活動，例如約一啲好耐冇聯絡嘅傳媒老友見見面，重通知各界友好，二月七號大年初十去禮賓府參加政府新春酒會，一眾老友聽到都心照，相信屆時Andy會一次過同新知舊雨打招呼，兼派新卡片。
早在傳Andy會加入政府之初，八方都搵過佢求證。當時佢唔認，重話之前都傳過佢去中大啦，結果咪又唔係。呢種轉個彎嘅回應，傳媒中人都好明白，畢竟立法會都未通過開位撥款，你叫人家點答呢。但呢類否認完又成為事實嘅例子，正係大家解讀新聞最好教材，好過搵人教mediatraining。
另一位去幫煲呔手嘅劉細良就老實好多，無論消息點傳，佢都冇呃人。細良重喺最新出版、由佢擔任總編輯顧問嘅《茶杯》月刊度同讀者以及戰友交代，即係講拜拜。佢話當日《茶杯》由周刊轉型做月刊，好似份「怪物」咁被人嘲笑，但笑笑吓已經出到第四十九期，佢感謝各同事支持，更要多謝Tom集團對佢咁「寬容」，佢話呢條路唔好行，但總算行咗四年，未來條新路又如何呢？細良冇寫到，不過佢心中應有答案。
同白鴿黨劃清界線
煲呔一連兩日公布局長同秘書長新安排，但至今未公布Andy同細良嘅任命，有人話可能同細良未搞掂民主黨員身份有關，八方知道退黨手續喺呢兩日已搞掂，細良已正式脫離民主黨。佢啲老友吹水時則戲言細良身為才子，感情生活多姿多采，可能喺呢方面要多啲時間做「品格審查」，否則日後爆出緋聞就尷尬死。
傳真︰2623-9278
電郵︰[email protected]