今日帶各位行花市,不過事先聲明,以下內容(尤其係價錢)純屬搞笑,皆因請來講價王森美、小儀對靚女薛凱琪、方大同及余宜發,分別在維園和花墟進行一場花市殺價大激鬥。兩隊均使盡冧功、逼功、茅招、美人計……到底誰勝誰負?
記者:陸伊琳、謝翠玲、馬靜兒
攝影:周旭文、黃子偉
鳴謝:雷霆881《一切從音樂開始》、叱咤903《架勢堂》
遊戲規則
每組$300大利是,1小時講價Shopping,以平得最多的一組為贏。
維園組贏面大
小儀抱病上陣,未開始,一知道對手係Fiona,竟妄自菲薄,「佢哋有靚女Fiona,一定贏硬。」咁又唔係咁講呀,早在挑選參賽者之際,我哋一班記者都預測維園組森美小儀贏面較大,憑佢哋嘅口才,維園貨種之多,對佢哋真係信心爆燈。至於花墟組嘅薛凱琪、方大同及余宜發,性格較文靜,我哋都有啲戥佢哋擔心,真係好睇臨場表現。
絕招一 嚴刑迫供 有着數
一入到人氣旺盛嘅維園,森美小儀遠遠見到有把一層樓過嘅吹氣鉸剪及摺櫈,於是大叫:「檔主喺邊!」老闆四眼哥哥好型咁話:「我哋未開檔,明天請早!」兩人見狀即擸迷你鉸剪摺櫈向四眼哥哥迫供。結果係點?老闆話:「大嘅就已經以$3,880賣咗,最多送迷你版鉸剪摺櫈,每人兩個啦。」「嘩!好着數,原價幾錢?」$50一個。兩人不禁大嗌:「有賺!」
絕招二 高價政策 有計
好嘅開始係成功嘅一半,森美醒目地轉攻學生攤檔,因為班學生離遠已癲晒咁狂叫佢哋,森美見狀殺價有望!不過機智嘅堅樂同學仔都唔弱,即考森美憑校服估校名。
當中有個男同學好有膽識重好似知道我哋嘅遊戲規則,眼都唔眨開價:「黑狗公仔賣$400,見你就$30啦!」成交,兼送價值$150(誇張開價)吹氣雙截棍,咁着數,又賺$520!
絕招三 扮熟無得平 鬆人
森美花弗有證有據,沿途唔少女仔都熱情地撲向森美,「你認唔認得我,我同你做過嘢。」唔好諗衰嘢,只係共事過啫,但森美一於好少理。同小儀商量嫌太平,決定唔買!
絕招四 細聲講價 大聲成交
可愛嘅小舞獅一隻隻在地上行走。原來呢啲小舞獅叫「阿福」,檔主開價$108。小儀今次玩秘密,拉開檔主細細聲講價,超抵價$28成交!
勝:共慳$1,943
暴民VSPOLICE
警察與暴民原來真係誓不兩立,森美小儀擸住「摺櫈鉸剪」一見到揸住「盾牌」嘅小學生便大打出手,小學生見勢孤力弱,即大嗌:「阿哥,幫拖!」大哥即攞起警棍,重演韓農對港警的經典場面。
維園shop171 理大學生
我哋嘅「鋤大懵」第二擊之特區搞乜鬼撲克,每張牌都畫上05年發生嘅特別事件,係個娛樂及教育並重嘅藝術品,每副$30。
維園shop71
12個舊同學,每人夾一千蚊,自己設計一批狗帽帽,每個$50,戴上頭頂好可愛!
維園shop158
個狗頭做得好辛苦㗎,其實我哋係賣一樽樽有意頭嘅米精品,有米有米,每樽$10。
維園shop72 王小姐
打打氣,賣$38咋,重唔拿拿臨嚟買番樽!
維園shop35 吳生同羅生
自己設計狗手掌,全港獨家,重連埋一條閃燈手帶,每隻$35。
街坊捧「吹氣」