森美、小儀殺價厲害，害得另一組嘅薛凱琪、方大同和DJ余宜發都很擔心。當Fiona知道要鬥減價嘅數目，她就更擔心：「吓？可唔可以換人呀？森美、小儀咁厲害，方大同唔識講價，一定輸。」方大同說自己可以用上海話講價，但廣東話就唔多掂。喂！唔好未玩就妄自菲薄啦。
減價送上門
Fiona說：「以前都有跟爹哋行花市，入行以後就好少，我以為今年無機會行，所以今日好開心。」DJ余宜發就每年都會到花墟買年花和桔。三人一到旺角花墟，已有大班fans圍住Fiona，為咗唔想輸得太難睇，佢多番使出招數，不過由於fans眾多，未正式開始就已被十幾人圍住，舉步維艱。靚女自然着數多，有人自動送禮物，有人象徵式收少少錢，不過，Fiona覺得點都要出絕招，才可以贏得好好睇睇。師弟方大同就邊玩邊學講價，余宜發則負責監工。結果，錢未花到一半，已換來大堆公仔。三人囂張得以為自己一定贏，將剩下嘅二百幾蚊捐埋出去做善事。
講價遊戲正式開始！！
一開始已有檔主自動送上一個海豚氫氣球畀Fiona，然後再以超特價賣史諾比和心心氫氣球。
絕招一出盡力𠱁
Fiona發揮每個女性潛在嘅講價能力，又𠱁又嗲，終於令檔主平一大截賣畀佢。
絕招二唱歌冧檔主
唱家班講價，最值錢就係把聲，唔識講識唱一樣得。
絕招三簽名博好感
每位藝人嘅簽名都賣錢嘅，你幫佢簽名，佢咪照價平畀你囉！
絕招四靠靚樣
Fiona樣子甜美，最重要係青春無敵，單攞個樣出嚟都講到價。
破繭而出
方大同終於處女下海講價，重有少少成績㖭！
做善事
因為Fiona佢哋只係用幾十蚊就換來大堆貨，所以勝券在握以為贏硬，重將剩餘嘅錢捐畀流浪動物，幫佢哋做絕育手術。點知最後……
戰績
只係半個鐘，用幾十蚊就買到咁多嘢，係咪好勁呢？
「狗」唔搭八
花巿年年有，今年特別旺，不過要成功淘金，都要花點心思。一個花市至少有百幾檔，就算貨品點特別、檔口唔搶眼，途人好易行過就算。要令人眼前一亮，最簡單係以布置取勝，例如檔名玩食字，好似「狗五馬六」、「狗咬狗骨」咁，一於以騎呢鬼馬取勝！
後生仔生意經
其他花市
今年全港共有14個年宵市場，除咗維園和花墟，另外也有以下選擇。
沙田源禾路球場花市
地址：沙田源禾路16號運動場側
攤位數目：約90個
黃大仙東啓德遊樂場花市
地址：新蒲崗六合街30號
攤位數目：約90個
觀塘遊樂場花市
地址：觀塘翠屏道觀塘道交界
攤位數目：約130個
荃灣沙嘴道遊樂場
地址：荃灣沙嘴道、大河道交界
攤位數目：約200個
深水埗長沙灣遊樂場
地址：深水埗長沙灣道
攤位數目：約110個
將軍澳寶康公園
地址：將軍澳運隆路
攤位數目：約80個
葵涌運動場
地址：葵涌興盛路93號
攤位數目：約100個
