噚日係音樂神童莫札特二百五十周年冥壽，香港電台嘅古典音樂台就喺中環聖約翰教堂，搞咗個莫札特名曲音樂會，重預備埋蛋糕，請啱啱行完年宵嘅煲呔同曾太，一齊同喺天上嘅莫札特唱生日歌做生日，重同莫札特祝酒。
煲呔過去好少講西洋古典音樂，唔知係咪俾肥龍感染，所以咁捧莫札特場，全程聽晒。莫札特嘅音樂好正，八方最鍾意係第四十交響曲，煲呔就話有好多佢都鍾意，但就冇講邊首，佢重讚揚莫札特嘅音樂美麗不凡、永不磨滅。
雖然就嚟新年假，但煲呔就同在場嘅音樂界人士，抱怨新年冇假放，日日都要繼續工作，但咁忙都嚟聽音樂，唔知係咪話畀在場嘅朱培慶知，港台都係推廣多啲古典音樂，唔好掂其他嘢啦！
傳真︰2623-9278
電郵︰[email protected]