好對唔住，昨日標題「買恒指C輪易搵利是錢」，話雞年最後交易日作壁上觀亦可，圖個開年好意頭亦可揸啲恒指C輪，點隻9683，搞錯，隻輪係P輪唔係C輪。冇得賴，唔關人哋事，自己搞錯。喺度寫輪10年零1個月，今鋪最烏龍。再講聲好對唔住。
雞年歲晚收爐，借住美股生性同日股暴升個勢，恒指急彈233點。總成交341億元，多過前市103億元。睇期指，睇成交，狗年紅盤高開機會大。當然，狗年開市前美股與日股嘅走向如何，對港股紅盤亦有左右作用。
輪市好誘人，捉得正，喺正股變動幾個巴仙中，大魚大肉，甚至鮑魚都有得食。例如前日推介嘅滙控C輪3400與電盈C輪9773，兩日下來，分別彈跳36%與38%。
中石油C輪9467：中石油（857）升0.20元，C輪9251收20.5仙，激升181%。下月7日最後買賣，剩番5個交易日，1.8%溢價，搞唔過。中石油C輪正路之選，係9467，5月上旬到期，輪價1.15元，平水，槓桿率6.6倍（有效5.7倍），引伸波幅28.2%。
馬鋼C輪3416：馬鋼（323）收2.825元，升5.6%。C輪9384收7仙，跳升133%。下月22日最後買賣，剩番16日交易，12.2%溢價，無謂搞呢件。馬鋼C輪正路之選係3416，9月到期，輪價45.5仙，負溢價0.1%，槓桿率6.2倍（有效4.5倍），引伸波幅35.2%。不過要考慮嘅係，正股升咗咁多，會唔會有回吐？
章盛