特色單位一向都係物以罕為貴，業主唔憂賣，但近期市場就多咗啲連天台嘅單位成交，因為經濟能力較強嘅買家，都覺得有天台單位，地方見使啲。
天水圍嘉湖山莊景湖居十四座E室頂層連天台複式單位，千二呎，剛以二百八十八萬沽出，呎價二千四百，雖比分層單位高，但較同類單位就平咗六巴仙。
利嘉閣陳偉倫表示，𠵱家屋苑嘅八百五十個放盤，平均叫價每呎都係二千蚊，但唔夠十個嘅複式，就要三千蚊一呎。陳偉倫話，經濟好，市民手上多咗錢，買嘢都爽手啲，自然會先揀特色單位。
另外，大埔翠林閣二座高層H室，六百二十二呎，連天台，以一百六十五萬成交，每呎二千六百五十三，美聯何翠珊話係市價。
不過，呢兩個連天台單位嘅業主都要蝕本，嘉湖山莊業主蝕十六萬，翠林閣業主就唔見咗四十五萬。
電郵地址：[email protected]