益安國際（082）自從上次變身鋼鐵股唔成之後，股價曾經回軟，但在狗年前夕，隻股又失驚無神勁升33.33％，收0.40元。但經紀陳就話完全唔覺奇怪，重話一早料到有此一着。
跌至低殘配股
益安去年年初，曾經公布入股大陸一間鋼鐵廠，查實就係變相賣殼，股價一度炒上1元樓上，但搞咗大半年後，竟然喺今個月宣布話唔玩，令股價急跌至0.30元以下的低位。
奇怪係當股價最低迷之時，益安公布以每股0.235元，配售1.2433億股新股，集資淨額只得2860萬元，但就佔已擴大股本16.1％。再計吓時間，承配人應該收到呢批新股。
經紀陳叫小初估吓係乜嘢人接咗呢手貨？小初只知呢班投資者帳面勁賺70％。不過，益安昨日成交股數1070萬股，金額只得392萬元，想沽貨套利唔係咁容易，仍然係紙上富貴。
慕容小初