臨尾1個大升市，送走雞年，迎來狗年，謹祝大家得心應手，由年頭賺到年尾，賺到夠晒喉。
港股市底真係好強，輕微調整兩日，又再大升，恒指高收15753，飆升233點，成交又大增到341億元，期指大高水110點。
雞年股市低開高收，低位約13300，高位係15800，相差2500點，由低位起計累積升幅約18%，其實大部份時間都係在窄幅內上落。不過，過去1年，賺大錢嘅機會一樣有好多，特別係中資股，好似內地地產股、銀行股、保險股同私有化概念股，升幅都好可觀。展望狗年，一樣會有唔少賺大錢嘅機會。
中資股氣勢如虹，H股指數高收6277，大升166點，資金重係不斷流入。一直看好嘅哈爾濱動力（1133），在雞年最後的1個交易日終於發威，搶上6.25元後回收6.15元，升5.1%，成交更大增到1150萬股，比前日多2.4倍。哈動今次有大成交支持，升破上升三角形阻力，照度上去，最少可見6.80元；若以去年11月開始的升浪計，突破去年12月底的三角形，今次完成整固後再上，目標指向7.60元。
去年11月首次推介世紀陽光（8276），當時股價2.175元，近日高見3.10元。事實上，世紀陽光係由去年10月中的1.75元起步，累積升幅77%，噚日卒之出現一次較大幅度嘅調整，低見2.75元後，上番2.90元收市，短期調整之勢會持續，但長線仍可看好，可候低收集。
已變身基金股
世紀陽光已變身為基金股，過去兩個多月，股價穩步上揚，與基金在市場不斷收集有關，去年12月中做嘅「披成」，5650萬股畀5大基金食晒。上月中，集團主席亦兩度吸納共121萬股，平均價約3元。
世紀陽光主要產銷有機肥料，中國係農業大國，有機肥市場係嚴重供不應求，集團今次「披成」集資，亦係用作開設新廠房兩期工程分別在06年底及07年底完成。08年開始，集團的有機肥年產量將會大增2.5倍至55.5萬噸，07年（12月結）及08年盈利分別可上升至2億及3億元，以8倍PE計，兩年後股價可見7字頭。
郭兆誠