醫務委員會唔准醫生宣傳，傳召醫黃霑嘅醫生聆訊（費事寫個名，否則又話宣傳），呢位醫生因為黃霑寫佢，陳惜姿喺《壹週刊》寫佢；竟然觸犯醫務委員會嘅神經，可說相當唔抵，冤哉枉也。以後傳媒訪問醫生，不如叫晒佢哋做陳大文醫生，登醫生幅相片，要在眼部打格仔。
哈，睇一月二十四日《星島日報》，以大篇幅報道「瑪麗名醫出走中環聚首」，寫咗二十三位專科醫生嘅名單出嚟，講埋佢哋係乜嘢專科，在邊一間大廈行醫，重有埋外號，例如富豪「御醫」余宇超，食道專家霍文遜、港大臨床腫瘤學系系主任岑信棠、心臟科大國手趙瑞華等等，講到明「畢打行匯兩醫院猛將」。
嗱嗱嗱，作為普通讀者，我哋多咗一啲寶貴資訊，要剪存呢篇《星島》報道作日後參考，如果要睇專科嘅話，睇呢批《星島》介紹嘅瑪麗醫院名醫，港大教授級人馬，唔會錯得去邊啦。
但作為醫務委員會主席麥列菲菲，佢老人家又有乜睇法呢？《星島》算唔算為呢批瑪麗醫生宣傳？呢批醫生算唔算喺《星島》宣傳自己？老實講，記者自己搵料，係咁寫，醫生有乜符？話醫生博宣傳，未免冤枉。假如醫生肯接受記者訪問？又算唔算宣傳？譬如講專科，記者多數唔識，要醫生講解病徵，診斷方法，醫治之道或者做手術嘅需要，記者聽完，如實報道包括受訪醫生名字在內，醫生算唔算宣傳呀？如果算嘅話，以後叫啲醫生蒙面見人，全部叫做陳ＸＸ。立法會議員郭家麒就叫做郭家麒，唔准寫郭家麒醫生，郭議員對記者唔可以講醫學，只係講政治民生。
病人有知情權利，第一個知情權就係可以知道邊位醫生叻，唔好誤訪庸醫。普羅大眾其實分唔清邊位係有料專家，只靠普通科醫生介紹，咁就衍生醫生與醫生之間嘅利益關係啦，醫務委員會敢唔敢話冇？