政改方案否決後，民主派同中央關係急凍，新春來臨似乎未有解凍迹象，中聯辦早幾日陸續發出今年春節酒會請柬，唔少愛國愛港人士已收到，但民主派卻未收到任何消息。
舊年中聯辦請咗十個民主派議員出席酒會，包括民主黨李華明、單仲偕同45條關注組四個大狀，但直至噚日，佢哋仍未收到請柬。
單仲偕同李華明都話，酒會二月尾先舉行，而且中聯辦人員要返內地過年，可能要放完假返香港先發出請柬，主席李永達話，佢舊年都無份，今年可能都唔請佢。
45條關注組方面亦話唔心急，不過其實都冇得急，馮檢基則收到中聯辦九龍辦公室嘅春節酒會請柬，西環總部嗰張就未收到，佢話既然九龍辦請佢，相信西環唔會將佢拒諸門外。
中聯辦春節酒會喺二月二十三號舉行，有愛國愛港人士話，中聯辦好重視份邀請名單，邊啲人獲邀，邊啲人無份，可以話係同中央關係寒暑表，政壇上邊一撮人要度過嚴冬，相信當事人心中有數。
傳真︰2623-9278
電郵︰[email protected]