小馬哥貴人事忙，約佢做訪問都唔易，但毓民出馬就冇問題。對台灣問題熟到不得了嘅毓民，喺九九年，即係小馬哥啱啱撼低阿扁做台北市市長嘅時候，就曾經同佢做過一次訪問；到咗今年，毓民喺大狀黨邀請下，又再去台灣同小馬哥做訪問，不過今次小馬哥已經係國民黨主席，地位唔同晒咯。
同小馬哥重逢，毓民覺得對方風趣幽默咗，當然都要賣吓口乖，讚小馬哥靚仔又成熟咗啦。今次訪問都係以台灣問題為主，點解唔問吓佢香港嘢？毓民話唔想害佢喎，驚佢講多錯多。
小馬哥喺香港出世，梗係想嚟香港睇睇，但係特區政府成日閂埋大門，唔畀呢位魅力領袖訪港，唔知係咪驚佢搶晒煲呔風頭？毓民引述小馬哥話，雖然好想嚟，但都明白𠵱家咩時勢，點解嚟唔到。真係大人有大量，特區高官係咪應該學吓呢？
傳真︰2623-9278
電郵︰[email protected]