政改方案過唔到，詩姐都冇計，照樣退休去也。退休後詩姐容光煥發，笑容都多咗，好似佢噚日去民建聯年宵檔攤做開幕主禮嘉賓，就好主動同記者傾偈，同以前十問九唔應真係唔同晒。今次重係佢加入政府咁多年嚟，首次自由自在行花市，一償多年心願。
今年係狗年，詩姐都係狗主，佢隻三歲狗狗叫泰山，兩個月大已經俾詩姐攞番嚟養。一講到愛犬，詩姐就好鬼興奮，大爆泰山有好多秘技，例如畀手手同反轉身，至勁就係詐死。重有呀，泰山會蝦詩姐㗎，只要詩姐一返工，泰山就呱呱嘈。而佢嘅百厭就街知巷聞，幾乎全部街坊都識得佢，冇人會「有眼不識泰山」。
八方記得周梁隻狗都識詐死，點解呢班獲老董信任嘅政界女強人，養親啲狗仔都識得扮死狗？唔通俾嗰時嘅特區政府工作態度感染咗？
民建聯一直好希望詩姐可以入番黨，詩姐就話自己心理上未ready，要多啲時間先得喎。呢個新年，詩姐邊度都唔去，只會同八十八歲嘅媽媽一齊過，好孝順。
傳真︰2623-9278
電郵︰[email protected]