吳文忻最珍惜的兩件珍藏品，是九八年參選港姐贏得的季軍冠冕和中學畢業穿過的低胸Ball裙。雖然無綫送的冠冕鑲的不是真鑽石，不過因為她通過選美加入娛樂圈，人生才會有這麼大變化。至於留學美國買的低胸裙，是出席中學畢業晚會時穿着，吳文忻笑指當晚沒有失身，該條晚裝裙是名副其實的處女Ball裙。其餘三件收藏品則包括米奇、米妮公仔和男友送的定情鑽戒。 採訪：朱倬誼 攝影：陳俊強
晒命朱義盛冠
「我九八年參選港姐攞季軍，呢個冠冕好有紀念價值，雖然只係冠軍嗰頂冠冕至有真鑽石，但係我一路都好好保存個冠冕。每次有朋友嚟我屋企，都話想睇吓，好似好威咁，事實上，我都係因為選咗港姐，人生先有咁大嘅轉變。」
媾仔低胸戰衣
「以前我喺美國讀書，中學畢業晚會係好重要嘅事，女仔要着BallGown，好多人講笑話嗰晚最易失身㖭，不過嗰晚我冇失身呀。嗰次係爹哋第一次陪我揀晚裝，呢條黑色連身裙當時要成二百蚊美金（約一千五百多元港幣）㗎。」
卡半定情鑽戒
「兩、三年前生日收嘅，亦係我第一次收到嘅鑽戒，重一卡半。以前都有人送過鑽戒，不過我唔敢收。我知佢（男友）有誠意，自己儲錢買，一個男人有一億身家，送十萬八萬嘅鑽戒係微不足道，但得十萬身家送隻十萬蚊嘅戒指，咁就真係好有誠意。」
Mickey陪住長大
「小學三年班，爹哋帶我去日本迪士尼樂園玩買咗隻Mickey，本來想買埋Minnie，但係爹哋唔肯。嗰時我七、八歲，隻公仔同我差唔多大，之後返香港同到美國讀大學返嚟，Mickey都陪住我，跟咗我好多年。」
過埠新娘Minnie
「喺美國讀大學，有次揸車去佛羅里達州迪士尼，見到呢隻Minnie好靚就買，因為屋企隻Mickey單身咗好耐，好想佢有個女朋友，冇咁悶。我成世人最鍾意呢pair公仔，我唔敢整污糟呢對公仔，有時都會攞佢哋去乾洗。」
