殼王陳國強卒之由娛樂版「回歸」財經版！佢老哥噚日特登開咗個小圍briefing，同大家講解吓賣Memorex單deal，但由於佢同葉璇小姐啲緋聞實在太「引人入性」，尤其是情慾短訊，所以華華同埋啲行家最後都忍唔住問吓佢係咪為咗避開人而換電話號碼。
外號爆棚哥嘅陳國強話，謠言止於智者，自己一向都有兩三部手機，只係華華啲行家成日打去問佢嘢，佢先至要換電話號碼，總之佢冇人要避，照爆棚哥咁講，殼王原來係俾財經記者「磨爆」至真！
講番個briefing，最奇特之處都唔係爆棚哥點回應佢啲豔聞，而係佢居然搵到「最唔鍾意人哋做佢世界」嘅和黃大班霍建寧，由和記大廈「特登」行過毗鄰美銀中心撐場！大致上，霍大班講番10年前搵爆棚哥去醫錦興，之後大家又點經歷困難，今日賣得成Memorex「骨」番7億幾，總算修成正果，佢重讚「爆棚哥幾時都咁爆棚，𠵱家唔止喺香港做世界，重喺外邊打天下……和黃作為股東都好開心。」就係咁，爆棚哥嘅身價當堂表露無遺，厲害！
李華華