做經紀想搵真銀，最緊要肯搏，祥益啓豐分行嘅溫容彩就深明此道。 早幾日帶啱個客，有興趣買屯門悅湖山莊一個單位，重立即落定，點知個業主身在上海，佢為免夜長夢多，漏夜訂機票，翌日晨早帶定金飛去上海，終於搞掂單生意。 個單位七百幾呎，成交價一百萬多啲，雖然兩邊實收都只係兩萬零蚊佣，真正落袋都係幾千銀，扣埋機票錢實質所得有限，之不過，原來咁啱佢想去上海好耐，一為神功二為弟子，賺到錢又可以玩吓，實在化算。