等咗幾個月，《GT》版電單車終於登場！好多GT迷由第一集開始捧場，嚟到改玩兩個轆嘅《TouristTrophy》，重講求平衡力同速度嘅配合，當鐵騎士駕駛住戰車，搖頭擺尾在所難免，更過癮係連車手坐姿也可作詳細調整，簡直係人車合一！連港人至Buy嘅彌敦道亦再次登場，真係自導自演番套《極速傳說》都重得！
記者：陳國輝
《TT》可算係《GT4》嘅變奏版，雖然入面啲賽道如彌敦道等都係舊嘢，不過今次換上兩個轆嘅烈火戰車，依然吸引！當中唔少得最重要嘅單人作賽、對戰以及考牌三大模式。戰車方面，遊戲收納咗十大車廠，包括BMW、HONDA、SUZUKI、YAMAHA等，加埋成80款，由綿羊仔玩到落場車都有。賽道多達37條，連《GT4》度玩到人嗌救命嘅紐堡林都有，條賽道咁長，電單車真係唔知點玩！
勁考平衡力
玩慣《GT4》嘅４個轆，突然叫你重新適應揸電單車，確實有一定難度！想喺《TT》入面做到人車合一，除咗戰車副「偈」夠勁，其次就落在車手本身嘅平衡能力。遊戲特別提供車手嘅動作設定，例如調整坐姿、頭部及腰嘅擺動程度等，都直接影響戰車片彎時嘅靈活性。當喺賽道上左搖右擺嗰陣最易炒車；相反，就算轉急彎擦過石壆，若然車身能保持平衡嘅話，依然可以高速繼續前進。
80款烈火戰車
牛記笠記扮劉華
雖然車種多達80款，但並非一開始就可以揀晒嚟用！喺「TTChallenge」模式，玩家要完成指定任務，才能增添戰車種類，比一般單憑以獎金換取戰車嘅方式，難度更高；除咗更換戰車，當然亦可以將戰車部件TuneUP，提升原有嘅實力！遊戲提供懸吊系統、煞車、輪胎、消音器以及傳動系統畀你慢慢搞，夠晒專業！最過癮係幫車手換衫；黑褸皮褲變晒牛記笠記，再改部馬力麻麻嘅街車，呢副裝束人哋實以為《烈火戰車》嘅劉華返咗嚟㖭！
拍低英姿做Wallpaper
自從《GT4》加入「PhotoMode」，可將戰車結合靚景Set做電腦Wallpaper之後，呢項分唇大受歡迎！《TT》玩得重激，啟動相機之後，還可以控制變焦、曝光以及景深等不同效果；相片解像度分為三種，最高為1,280×960，唔單止可以抄落電腦SetWallpaper，甚至乎可直接Print出嚟，當正遊戲車手就係自己！
PROFILE
遊戲類型：RAC
對應機種：PS2
遊玩人數：1至2人
行貨售價：$318
開發商：SCEI
(C)SonyComputerEntertainmentInc.
售賣點：DreamStore（25753285）
地址：灣仔東方188商場G04號舖