今日年廿八，當然要洗邋遢，嚴淑明和李思蓓特往浸花瓣浴一洗頹氣。去年嚴淑明頭頭碰着黑，被指變性人，行騷又失鑽戒，她希望洗過白白後，外界不要再談論她的喉核有多大。
雞年對嚴淑明來說是個是非之年，除演出時甩裙、被偷拍換衫、行騷時又遺失鑽戒，更被指是變性人，倒楣事一樁接一樁，有人更認為種種是非也是她的搞作，趁機博宣傳。
愈多是非愈出名
對此嚴淑明苦笑說：「呢啲新聞的確令到我嘅知名度大增，好似話我係變性人呢單新聞，如果唔係香港傳媒做到咁大，我諗香港都冇乜人識得我，我𠵱家連落街買外賣都要係咁意執吓個樣！但作為藝人，如果只能夠用緋聞或者是非嚟維持演藝事業，冇人留意自己嘅工作，咁真係極度失敗，不如早啲收山好過！」
嚴淑明續說：「初初入行就話有啲新聞可以提高知名度，但餐餐都係咁，我自己唔厭，觀眾睇都睇到厭啦！所以我希望年廿八洗晒啲衰氣，新一年有新開始，希望多啲人留意我嘅工作，而唔係睇我粒喉核有幾大。」
而李思蓓則往美容院享受牛奶玫瑰花瓣浸浴，務求以一身香氣迎接新年。李思蓓日前談到狗年願望時說：「身體健康係最緊要，以前我唔識亦唔覺得重要，但舊年令我覺得呢四個字對我嚟講真係好重要。」
問李思蓓可會在家大掃除？她笑說：「大掃除由工人搞，我自己就冇乜過年習俗。」
紅色內衣增桃花
很多人過年都會添置紅色新內衣，思蓓則說：「咁又冇喎，或者今年會試吓，因為我三年冇拍拖，都想睇吓整套紅色內衣會唔會連桃花運都旺埋。」李思蓓已準備隨時闖情關，她說：「我真係好恨拍拖㗎，都單身咗三年，自由慣，想搵個人管束吓自己。」
採訪：戴彩煥、馮美茵
攝影：何國豪、陳慧安
李思蓓場地提供：卓悅纖體（好望角分店）
