期指結算日，亦係雞年最後第2個交易日，睇恒指，個市好似冇厘火氣，但亦有大批非恒指成份股意氣風發，炒家未收爐。大隻股，可能係等埋過年，然後再戰。
恒指C輪9683：恒指收15520，跌唔夠1點。日經指數收15891，升240點，恒指冇跟到日指走，𠵱家低過日指371點。上周三，活力門事件令到日股跌到四腳爬爬之時，日指最低15059，恒指當時最低15376，高過日指317點。個幾禮拜光景，日指又再爬頭。
今日雞年最後交易日，壁上觀亦可，等狗年再戰。想揸C輪，等狗年紅盤高開搵利是錢，圖個開年好意頭，亦可揸啲恒指C輪，例如9683。隻輪4月尾夠鐘，輪價13.2仙，溢價2.9%，槓桿率29.4倍（有效14.6倍），引伸波幅16.5%。咪諗P輪住，呢幾日，外圍咁掂，港股冇跟到，過年紅盤高開多過低開。
國壽C輪9404：國壽（2628）收7.60元，移低1格。再回落些少，買國壽C輪，正路之選係9404。
9404喺4月初夠鐘，輪價762仙，溢價3.2%，槓桿率10倍（有效7.3倍），引伸波幅31.3%。另外1隻可以考慮嘅係9447，呢隻上車落車更加容易。
章盛