要數邊個係香港派利是最多嘅利是王，國泰CEO陳南祿一定上榜，Philip噚日提早同傳媒拜年，原來佢每年年初一必定會喺朝早六點半出門，爭取時間向二千個喺年初一返工嘅員工派利是。
呢一日行程由赤鱲角機場開始，因為有早機要飛，佢要親手將利是派畀空姐同機師。之後佢去地勤、空運站，再返番國泰大樓行晒全部九層，中間只有些少時間食個漢堡包。黃昏重要衝出市區嘅辦事處，再搵旅發局花車巡遊嘅空姐，咁先至行完大運，可以返屋企陪阿媽食飯。佢話今年好啲，中午會返一返屋企食飯，但夜晚就返唔到嘞。
狗年係國泰好值得紀念嘅一年，Philip話國泰剛好六十歲，所以○六年會搞一連串大型活動，除咗叫空姐着晒國泰歷來八套制服，等乘客細味一下，最搞鬼係搞古老當時興，拎番六十年代嘅產品出嚟，當時送畀乘客嘅兩款手提袋會重現香港㖭。講開六十年代到𠵱家，物價梗係漲到計唔到，但有一樣嘢就縮水縮到估唔到，就係機票價格。六十年代一張去新加坡經濟位來回機票係一千四百幾元，𠵱家國泰話只要一千二百幾元，而當年人工都只係幾百蚊，可想而知當時搭飛機真係幾大件事。
傳真︰2623-9278
電郵︰[email protected]