後日就係狗年大年初一，節日氣氛愈來愈濃，唔少有關春節的新聞均被大炒，連鬼子佬經紀行都想出位，諗吓點應節。
往年里昂一直獨領風騷，因為佢哋每年都會發表風水指數，預測港股及名人流年運程。不過自從去年里昂風水師劉紹文（中）過檔瑞信後，風水指數今年冇咗；而劉紹文將呢個噱頭帶去瑞信，但就改變咗形式，唔再講風水指數，而係教你點樣善用「利是」去投資，一樣同農曆新年扯上關係。
劉紹文噚日同郭榮泰（左）、陳昌華（右）又着住成套唐裝衫率先同大家拜年，順便教人點用利是錢投資，但華華就認為呢一招遠遠唔及風水指數咁殺食，唔知係咪瑞信比較保守唔敢抄呢條橋。華華如果係公關，一定搵間大行sell畀佢，本錢小小效果大大，啱晒啲想博出位嘅行呢。
程志遠攝