世紀廿一奇豐物業董事李峻銘，向來為善最樂，自己身體力行之餘，亦好想員工一齊參與，但係了解到同事工作時間長，莫講話做義工，公餘連休息時間都唔夠，於是佢諗到個兩全其美嘅辦法，就係容許分行員工喺工作時間做義工。 早前為志願團體耆康會籌款嘅賣旗活動，就動員咗二十個分行員工參與，喺朝早八點至十一點嘅工作時間，去到美孚地鐵站附近幫手賣旗，雖然有員工認為賣旗比帶客睇樓更加攰，但係就好有意義，佢哋話有機會都想再參與。