最近發展商唔勾地，積極收購市區舊樓，北角繼園下里福安樓，同埋附近嘅幾幢舊樓，密密有人收購，懷疑都係由新世界發展有關人士提出，事關土地註冊處最近連續幾宗地舖成交，買家都係傑時有限公司，而公司董事之一嘅翁家灼，係曾經入則申請重建西環卑路乍街四十二至四十四號商住地盤嘅律師。
新世界最近話今年開賣嘅新盤，會包括呢個卑路乍街項目，所以令人聯想到福安樓一帶舊樓收購，都係新世界嘅傑作，不過新世界呢兩日都冇回應。
有報道話福安樓連同隔離繼園樓，佔地差唔多八萬呎，如果完成收購，可以重建六十三萬方呎，等於兩個大坑麗星樓嘅規模。最近土地註冊處嘅登記，除咗福安樓同繼園樓，翁家灼亦透過財軒有限公司，以五百多萬收購附近繼園下里一至七號兩個地舖，即係話重建規模會再擴大。
中記報料話，有個福安樓業主，持有個實用面積五百幾呎單位，由發展商出價近三百萬收購咗，即係呎價近六千蚊，比鰂魚涌吉祥大廈由經紀建議嘅收購價重高，顯然個發展商已胸有成竹。
電郵地址：[email protected]