王晶最近四出為佢執導嘅新戲《野蠻秘笈》做宣傳，即使主角張栢芝同古巨基唔在場，佢都好勤力接受訪問，來者不拒，日前佢喺南京宣傳，竟然公開話章子怡係荷李活嘅廉價勞工，又話張栢芝喺《無極》裏面嘅角色唔啱佢做。
王晶被問到有冇打算去美國荷李活發展，佢話絕對唔會，佢冇興趣，因為荷李活嗰邊只係想請廉價勞工，見邊個賺得吓錢就搵邊個去，王晶重話：「現在劉偉強也過去了，但我沒這個打算。」
批陳凱歌用錯人
講起章子怡喺外國似乎好吃得開，王晶就話：「章子怡也是荷李活的廉價勞工，她的片酬能跟茱莉亞羅拔絲（JuliaRoberts）相比嗎？」王晶話荷李活分五級，佢好清楚周潤發嘅片酬，所以章子怡只係低檔次嗰一級，大概一百萬至四百萬左右，而十一年前周潤發喺香港已經有二百萬片酬。
王晶講完章子怡後再講張栢芝，王晶話張栢芝係愈清純愈靚嘅，所以佢根本唔適合做《無極》裏面傾城嘅角色，豔麗唔係好啱佢，王晶話陳凱歌用錯人，傾城個角色應該係後生嘅林青霞做最好。
