計正就快過年，大市應該轉為淡靜，但查實又唔係，昨日創科實業（669）因為被大行調低盈利預測，股價走勢好似過山車咁波動。
經紀黃話，近排大行紛紛為創科出報告，但一直未見公司有任何反應，估計在公司作出回應前，股價繼續大幅波動。
創科自從在本月中被外資基金在18元樓上減持幾千萬股後，股價走勢積弱，其後外資大行紛紛出報告，有唱好有唱淡，但以昨日德資行唱淡的一份最有威力，創科最低跌過落14.50元，收15.50元，跌9.09％。
市場等管理層解畫
但最勁都係隻股嘅成交量，成交股數高達6113萬股，金額9.34億元，計落重多過建設銀行（939）同埋和黃（013）。經紀黃話，市傳有對沖基金伺機發難，趁消息負面借貨沽空，令跌勢加劇兼成交量大增。
經紀黃重話，想要創科管理層出嚟解畫，分分鐘要等到2月底或3月公布業績時至有機會。
慕容小初