農曆新年就到，唔少行業都準備歲晚收爐，不過，多勞多得嘅地產代理，就博到盡，四間代理有近一百六十間分行，年初一照常營業，實行年終無休，趁新年假期繼續搏殺𢱑銀。
過去三個月，樓市淡靜，代理行要蝕錢，前線好多都食白果，既然部份發展商話，農曆年期間照常打開門口賣樓，代理梗唔放過呢個搵客做生意嘅機會，希望幫補吓。
美聯同港置分別有六十四間及五十八間分行，初一繼續開門，中原同利嘉閣，就有二十八間及九間，除咗利嘉閣，各間代理行農曆年期間，前線開單都有利是收。
中原執董陳永傑話，農曆年二十九至初三，打算派三百封每封二百蚊利是畀開單嘅前線，三百五十個後勤開工利是五十蚊，淨係開單同開工利是，預算使七萬七千幾蚊。中原所有分行初二全線啓市，美聯物業就係初三。