家陣做議員，唔係話識得搞吓地區活動，知道吓政治大氣候，識得同市民排難解紛就得；如果冇返幾種「技倆」傍身，真係好鬼蝕底，下次選民未必選你㖭。
好似新年將至，市民梗係好想議員寫個揮春嚟貼吓；如果拎起毛筆都唔識點寫，街坊梗係唔滿意啦。民建聯劉江華（圖）都睇到呢個問題，所以就積極練字，結果由以前只係識寫個「福」字咁大把，到今時今日可以寫到「招財進寶」四隻大字，明顯下過苦功。佢重話，地區搞活動時，時不時失驚無神請佢哋上台獻唱一曲，所以自己得閒都練吓歌，以備不時之需，真係好似演藝界人士咁多才多藝。
咁有機會轉戰直選嘅議員，例如王國興咁，係咪都要開始備戰？如果王國興表演音波功，話唔定可以成為新一代師奶殺手㖭。
傳真︰2623-9278
電郵︰[email protected]