今年經濟幾好，唔少老闆都喺過年前呢幾日派花紅畀員工，好似一向以「最有良心」地產商自居嘅恒隆，噚日就向旗下逾1600名員工分發花紅。聽執行董事吳士元講，唔係個個員工都有花紅分，好似佢同一班「核心」管理層，花紅同業績表現掛鈎，所以要到6月年結時先計算，至於一般員工同高級管理層就跟大圍，喺年尾分。
大企業潮流興按表現分銀，恒隆唔例外，吳士元重話舊年租務部業績好，所以今年租務部同事嘅花紅好和味，對上嗰年佢哋賣君臨天下賺到笑，嗰年售樓部同事可以話大豐收。
今年一般員工最多有一個月花紅，高級管理層最多嗰個相等於四個月薪酬。不過，攞得咁多花紅當然亦要有番咁上下貢獻，所以要逐個「照肺」，吳士元噚日上晝就逐個見啲高層員工，傾下未來一年工作方向。你話打工仔搵食幾咁艱難呢。
李華華