大狀黨噚日喺外國記者會（FCC）同記者吹風，關注組四大狀湯家驊、余若薇、吳靄儀同梁家傑到齊，另外，梗唔少得組黨中堅分子關信基、李志喜、鄭宇碩、張超雄、毛孟靜、黎廣德、陳家洛同陳祖為。
吳靄儀開宗明義話，佢哋喺度鑄黨唔係組黨，即係慢工出細貨啦；關教授就講明佢哋唔係要搞革命黨，只係想做啲正常社會都會有嘅活動，同時打破君子不群不黨嘅講法。「君子也黨」，所以大家如果叫佢哋做君子黨，睇嚟佢哋唔介意，當然最後叫乜名要等到三月某一吉日先揭盅。
四大狀嘅目標係鑄個跨階層嘅黨，而關教授就話最高境界係除咗要做一個議會黨同選舉黨之外，重係一個植根喺社會嘅政黨。
鄭宇碩就最風趣，話個新黨同民主黨最大不同，係佢哋啲女生了得，應該可以吸引更多女性選民喎。
傳真︰2623-9278
電郵︰[email protected]