個市好似隔夜油炸鬼，軟軟哋，冇厘火氣，恒指唔見10點。睇期指，則好似想好，1月期指今日結算，高水42點，2月期指更加高水85點。有可能好友暫時放慢手腳，踏入狗年先至搞嘢。
滙控C輪3400：滙控（005）收128.30元，再跌0.30元。兩個半星期前，滙控最高131.90元，計落至今調整3.60元。下月尾宣布全年業績，盤數彈出，PE落到13倍幾，點睇都係偏低，係時候收集C輪。
滙控C輪交投最旺嘅係3400，有78球易手，金額2千萬元。炒輪當然唔係淨睇成交量（炒即市上落三幾格賺碗叉燒飯則首要睇成交量），重要睇埋數據。隻輪4月初夠鐘，輪價24.7仙，溢價0.9%，槓桿率51.9倍（有效26.4倍），引伸波幅11.4%。1個唔覺意，滙控見番13個月前136.50元，和味咯，隻輪值95仙。重有兩個月時間，恒指創新高，滙控重見舊時高位，唔係冇可能也。
電盈C輪9773：盈大（432）升5.7%，收2.325元。同枝同氣，電盈（008）收4.95元，爬高1格。諗電盈C輪，買9773，6月尾夠鐘，輪價42仙，溢價5.5%，槓桿率11.8倍（有效7倍），引伸波幅28.4%，數據呢隻最靚。
章盛