前日係寶詠琴生忌，佢嘅舊愛洪朝豐雖然幾經波折先搵到前女友嘅靈位拜祭，但佢覺得寶小姐生前做過咁多善事，但一過身就冇人記得，所以好惋惜！
洪朝豐噚日同馮仁昭話：「寶詠琴好善良，佢生前一位同學經濟有問題，冇能力供個女讀大學，寶詠琴即刻送對方個女去美國讀書，畀晒四年學費。佢認為邊個政黨幫到香港人做嘢，佢都會捐錢畀嗰個政黨，甚至知秘書Betty想幫仔女買樓，佢都即刻將層樓買咗，然後等Betty慢慢供款畀佢。」佢重話：「之前我話鳴煒（寶詠琴兒子）同Betty收番層樓，其實係記者聽漏咗，當日我係講鳴煒唔係太清楚佢媽媽同Betty嘅事，以為層樓係佢媽媽嘅先至有咁嘅誤會，鳴煒後來清楚件事後都即刻畀番層樓Betty，等佢慢慢供。」
關心前夫
洪朝豐又話：「外界以為寶小姐同劉生離婚後好似大仇家，但其實佢哋彼此都好關心對方，當日寶小姐知道劉生有糖尿病後好擔心，所以我先至會話佢大魚大肉嘅話對身體唔係咁好。至於我話劉鑾雄糖尿病，其實係出於對佢嘅關心。」○三年寶詠琴逝世後，洪朝豐曾經匿埋喺屋企七日七夜，除咗避開傳媒，主要係喺屋企悼念呢位紅顏知己，重寫咗四篇悼念文章燒畀佢㖭，認真深情。