黃宗澤的五星級寶貝包含了他不同階段的第一次，有央求父親買的首部遊戲機、初中兼職賺錢買的超任遊戲機、開竅好書《哭泣的阿富汗》、「不留名」面罩和兒歌獎座。去年黃宗澤主演人氣劇集《我的野蠻奶奶》，戴上面罩飾演「不留名」，第一次贏盡口碑，看見一片光明星途。
響朵膠面罩
「舊年拍劇集《我的野蠻奶奶》，演『不留名』要戴面罩，公司幫我倒模做咗幾個，呢個係我專用嘅，係膠嚟嘅，好輕身、好貼，拍完之後我就攞咗返屋企留念。呢套劇令我嘅演藝事業有轉變，有大進步，『不留名』對我好重要。」
唱兒歌獲獎
「舊年八月，我憑《哪吒傳奇》攞到兒歌金曲頒獎典禮嘅金曲銅獎，係我喺公司攞到嘅第一個獎，到舊年十一月，再攞到飛躍進步男藝員獎，但係始終第一個獎印象特別深刻。」
古老遊戲機
「我嗰時讀緊小學三年班，得八、九歲，求咗老竇好耐，佢終於買咗呢個Sega遊戲機畀我，係我第一部遊戲機。雖然好多年冇玩過，但係一直唔捨得丟，因為我覺得好有紀念價值。」
賺錢買超任
「呢部超級任天堂係我初中儲錢、第一次買畀自己嘅禮物，嗰時賣成一千蚊，我做兼職倉務員，儲咗半年錢先買到。其實我唔係好鍾意打機，不過屋企成日冇人，媽咪又有生意做，買部機可以等同學仔嚟屋企時招呼佢哋，我玩嚟玩去都係孖寶兄弟game咋。」
反戰書內省
「呢本《哭泣的阿富汗》勁正，睇完會令人感受到打仗帶嚟嘅痛苦。我睇過一次，已經好記得內容，印象好深，係講一個住喺阿富汗難民營嘅女人，打仗時逃亡，又要照顧家人，佢阿爸癲咗、有家人斷腳，佢仍然要好堅強咁生存，令我明白幸福唔係必然嘅。」
採訪：朱倬誼
攝影：何國豪
服裝：SistyrMoon
場地：詠藜園
