受惠於經濟好轉，打工仔加薪派花紅喜訊不絕。美聯集團主席黃建業話，美聯及港置後勤員工，今年加薪幅度由百分之三到三十三，視乎表現決定幅度。
對家中原集團就未有具體加薪大計，管理層話，會視乎表現而定，舊年最高加薪幅度係兩成三。
利嘉閣執董廖偉強話，向來以派花紅取代加人工，若果公司賺到錢，就派花紅，與員工分享成果。不過，後勤若表現極為突出，個別可望加薪一成。
幾年前，「沙士」一疫，經濟蒙受重大損失，唔少公司都凍薪或減薪節流，緊縮開支，代理行唔例外。近兩年，市道逐漸好轉，人工先至慢慢返回或高於「沙士」前水平，打工一族，終於可以鬆一口氣，消費比以前鬆手。
雖然可以大幅加人工嘅後勤，唔會多得去邊，不過，始終都好過冇。今年加咗人工之後，後勤收嘅花紅，唔知又有冇舊年咁多呢？睇嚟，惟有寄望今年樓市重順風順水至得。
電郵地址：[email protected]