亞視《喜有此理》有Noise，睇番至知劇中飾演突發新聞記者的吳亭欣（Lulu），除俾八卦雜誌偷影過露台三點式豔照外，原來重係個「飲食節目」主持人。掛「飲食節目」主持人牌頭？有幾分姿色唔等於識飲識食喎，佢話：「食乜都好，最緊要平靚正，平靚正先食得開心。」見佢由最初的單叉懶矜持慢慢放入口，至中段刀羹齊出質入口，到最後索性揦起手吮入口，食唔識食暫時未知，但食得開心就肯定嘞。
記者：盧家蕙
攝影：周旭文
BabyCafe：大件夾抵食
「BabyBlueCafe&Bar」一向主打Mussels藍貝，藍貝者，其實同港人熟悉的青口屬同類，因外殼呈藍色而得名，負責人Ben話：「我哋重供應生蠔、法國螺、龍蝦等等多款海產，大部份都選用歐洲貨，唔新鮮唔當造唔入口。」新鮮是應份，又霉又削的海鮮搵鬼食，Lulu搭嗲推介不遺餘力：「最正係價錢抵到爛，單睇價錢可能唔覺特別平，但平在碟碟都抵食夾大件，憑我多年做飲食節目主持經驗，睇得出呢度用料新鮮，啱晒三五知己飯敍，裝修唔錯食飽Hea吓都好唔錯。」論裝修，店子以藍橙二色為主調，卡位做到成個獨立廂房咁極搶眼，加上Sharp爆螢光青綠色Bar枱，擺明吸引年輕潮食一族。
歐陸海鮮拼盤$118
拼盤有齊藍貝、龍蝦、生蠔、加拿大蜆、法國田螺，Lulu話：「我好鍾意食海鮮，一食就諗番夏天嘅Wakeboard、同朋友去Hawaii徒手捉海膽嘅經歷呀。」
牛油芝士藍貝$128
Lulu好有見識咁話：「正宗歐洲食法係用手食，用個殼夾啲肉出嚟食，最後重要吮埋手指，我食相好Wild㗎。」藍貝散發濃郁牛油芝士香，加上有火㷫住，汁底唔會凝結，記得用汁蘸麵包呀。
煎帶子蘑菇天使麵$62
Lulu話：「對天使麵嘅情意結源於張小嫻小說，記得其中一本經常提及AngelHair，自此就覺得食親天使麵都好浪漫喇。」香濃蒜茸及牛油味滲透每條AngelHair，當然，若你有Lulu嗰份少女情懷，應該會更好味。
二人繽紛茶敍$78
芒果慕絲千層酥、蘋果撻、焦糖布丁、煙三文魚、煙火雞酥皮盒、咖喱牛肉酥及迷你三文治，款款賣相精緻，Lulu：「次次食親都唔知食邊樣先，好彩細細件食咗唔怕肥。」
BabyBlueCafe&Bar（28828770）
地址：銅鑼灣駱克道463-483號銅鑼灣廣場2期9樓
營業時間：星期日至四12:00nn-1:00am，星期五及六12:00nn-3:00am
座位：200個
印尼餐廳1968：易店名班底無變
「印尼餐廳1968」有30多年歷史，特意喺店名後加「1968」這個年份，以示其身份地位。餐廳早喺1968年於恩平道開業，係香港最早期的印尼食肆，至1982年時遷往禮頓道，一直由印尼華僑蔣太主理，上年由蔣家三位公子接棒，進行大革新，大肆裝修後令餐廳別有一番新景象。廚房班底則無變，依然由印尼人掌廚。Lulu同大公子Hudson好鬼老友，一見面已經雞啄唔斷，邊食邊講是非，笑到拍晒枱兼收唔到聲：「知佢係太子爺，不過唔會因為咁而Hardsell，呢度嘅印尼菜真係勁啱港人口味㗎。」
沙嗲串6串$60
可選雞、豬、牛或羊，蘸香濃惹味的秘製醬汁一絕，Lulu話：「最鍾意雞肉，白肉無咁肥嘛，串燒好Juicy唔會硬邦邦。」
燜牛脷$78
牛脷燜足成日勁腍，未上枱已經聞到濃烈肉香，Lulu話：「牛脷大大件腍得嚟又索味，加埋蒜茸汁好香口，送飯一流。」
黃薑雜錦飯$78
Hudson講古：「舊時印尼人生活清貧，好少大魚大肉，加上呢個飯製作繁複，所以逢星期日或者大時大節先會食呢個飯。」食材計落有炸雞翼、酸辣牛肉、粟米餅、鹹魚仔、酸辣薯茸，Lulu說：「配菜多，啱晒我呢亭乜都想試少少嘅人。」
食客有Say
（左）印尼華僑Winda：「鍾意燜牛脷，腍腍哋好好食，幾似屋企煮嗰啲菜囉。」Yuk：「我同朋友經常嚟幫襯，裝修都幾有氣氛，坐得舒服。」
印尼餐廳1968（25779981）
地址：銅鑼灣禮頓道28號地下
營業時間：12:00nn-11:30pm
座位：70個