信科學還是信玄學？昨日提到地產經紀Ｗ，佢話睇數據，新樓供應在未來兩年有斷層，買新樓要趁早，佢又引述新鴻基地產高級經濟師麥力強之言，話香港出生率止跌回升，結婚人數上升，離婚個案上升，在在對樓價有利。
經紀Ｗ更講到：「地產商睇準政府堅持不賤賣土地呢一點，一於唔勾地，等政府幾個月唔可以賣地。另外，上一次賣地，大家bid到鬼咁貴，因為地產商估死地政總署會以最後一次拍賣地價作為談判補地價嘅最低價，既然上次地價貴，地政總署一定唔會在補地價方面讓步。你睇見啦，最近大圍馬鐵站延遲招標，就因為補地價傾唔掂，屯門西鐵站上蓋無地產商問津，因為補地價太貴。結果係點呀？可供發展用地嘅供應減少，有地在手嘅地產商佔盡上風。」
地產Ｗ講到似層層，一時之間駁佢唔倒，可以阻止樓價上升嘅，有乜嘢因素？較早時《蘋果日報》引述政府數字話香港已發入伙紙啲新樓，十室九空，空置率甚高，可能係（一）未賣得去，（二）新貨在炒家之手，套牢咗。香港嘅樓宇單位存貨量，約與家庭數目相等，香港目前係有樓冇人住，唔係有人冇樓住，即使未來兩年新樓供應量比正常少，都唔會出現樓荒現象。
根據現有數據預測將來，未必算係科學，因為預測結果唔會係必然準確嘅。至於玄學，就係命相風水師傅Ｃ嘅預測，佢睇得好悲觀，佢話：「自己嘅預測，中一半都唔掂！」佢在○四年十二月曾經預測過，恒指一定在○五年內升到一萬五千點（見本欄○五年五月一日），後來果然。既有此記錄，你話唔信師傅Ｃ喎，風險自負，故此有「信科學還是信玄學」之嘆！
一樣信一半又如何？做法就係步步為營，○六年對任何投資都唔好高追，唔借孖展，有機會賺錢嘅話，獲利回吐永遠唔錯得去邊，唔好貪心到要賺到盡咯。