滙豐鄭海泉搬新屋，進駐山頂中峽道。八方噚日喺美商會嘅飯局，見到鄭大班，佢話農曆年會留喺香港過。咁又係，應該要招呼吓親友，參觀一吓間大班屋。間屋連花園成兩萬幾呎，鄭大班雖則冇好似曾特首咁起魚池，但佢就話會諗緊整番張乒乓波檯，得閒打番兩板。
滙豐呢間屋，有成七十幾年歷史，屋地兩萬三千呎，樓高兩層實用有九千呎，係一九三四年由美國運通向政府買地起嘅，滙豐就喺七三年用四百三十萬買入，家吓就梗係升價百倍啦！曾經入過去嘅人話，間屋個天花好靚，樓底夠晒高。
講完大屋，有傳媒向鄭大班投訴，話喺滙豐換唔到新銀紙，大班話自己都係用舊銀紙，果然響應任總呼籲；至於員工開工利是，佢話唔知滙豐有冇開工利是，冇所謂啦，就算滙豐冇，大班自己派咪得囉。
傳真︰2623-9278
電郵︰[email protected]