近期出鏡率最高嘅動物，非狗仔莫屬，無論真嘅抑或假嘅都應有盡有，處處提醒大家，狗年將至喇。
立法會內嘅「狗」氣都相當重，點解？因為入面有六個「狗男女」。一九四六年出世嘅狗仔狗女有四個，就係大班、金勞詹、嫻姐同小霍；後生十二年嘅狗仔就少啲，只得兩位大狀梁家傑同鄺志堅。
據聞大班喺立法會中，都叫鄺大狀做狗仔，當然佢冇乜貶意，事關佢重自嘲係老狗㖭。大班歎曰，自己大過鄺大狀同傑哥一轉，足足十二年喎，係時候退休喇。咁佢係咪○八年真係唔再選先？
大班叫傳媒留手
大班去年都算招風招雨，今年又犯太歲，可能重大劑，所以佢好希望喺本命年可以減少是非，安然無恙咁度過就好滿足。佢重特別叫傳媒手下留情，唔好郁佢咁多喎；之不過呢，人哋郁唔郁你，都要視乎你有冇做錯嘢先得㗎。
狗仔鄺志堅就話，查實自己屬乜都未明，因為佢喺農曆年尾出世，有高人同佢講，咁計法可能係雞佬嚟㗎喎，所以鄺大狀對身份認同問題都非常迷惘，跳入呢個生肖灰色地帶。
不過，無論係雞定狗都好，鄺大狀都希望新嘅一年，特區唔好再「雞犬不寧」，人人都開開心心。佢重話八方應該再八啲，要爆多啲料先好睇，咁真係要靠佢多多提供至得喎。
唯一一隻狗女嫻姐開口埋口，梗係離唔開打工仔，所以佢希望所有打工仔喺新一年，可以好似狗仔咁生生猛猛，有人工加就至好，但千祈唔好做到隻狗咁辛苦喎。而嫻姐嘅個人願望，都係同工人有關，就係最低工資問題可以有喜訊。佢話呢樣嘢煲呔應承咗搞好耐㗎喇，今年一定要還畀打工仔，唔好開空頭支票。
傑哥講九唔講狗
平時踏踏實實嘅傑哥，唔似狗仔咁活躍，但佢嘅新年願望，都同「狗」有關；不過此「九」不同彼「狗」，因為佢係希望政府喺西九問題上可以按民意處理，極力反對𠵱家咁嘅安排。
立法會咁多「狗」議員，官場又有冇「狗」官呢？八方睇過喇，一眾司局長中，冇人係四十八同六十歲；最近嗰個叫周一嶽，都係四七年出世，差少少。林D9亦唔係屬狗，換言之政府主要官員全冇「狗」官，八方都好希望真係咁！
傳真︰2623-9278
電郵︰[email protected]