長假前市況大牛皮，觀望氣氛極濃厚，但上升股隻遠比下跌股隻（都不計認股證）為多，顯然投資者心目中仍有唔少心水股，恒指收15520，跌10點。
又係炒股唔炒市，上周推介嘅銀建國際（171），噚日在淡市中發揮出熱力，收2.45元，升7.5仙，成交更大增到4077萬股，「些那」雖重，但「拜也」亦少見有幾球幾球掛入的賓虛場面，人氣爆棚。銀建家吓走勢似已完成圓底收集形態，升破2.50元的降軌阻力，新升浪即可確認，短線目標2.70元，中線可重上3.50元水平。
銀建做「資產包」，而且新「包」會陸續有來，未來幾年盈利有咗穩定上升嘅保證，聽聞呢輪中資線買盤好活躍，佢哋落得手，必有智珠在握，而外資大行亦推薦買入，目標價分別為3.20元同3.40元。
首長國際（697）在0.60元水平整固，形成上升三角形，噚日破位而上，收0.61元，升2仙，有大成交配合，目標0.75元。
月初推介首國，當時股價0.53元，題目係「上升空間大」。首國成功轉型後，股價表現愈來愈強，05年（12月年結）中期獲利3.34億元，已大升2.2倍，每股盈利7.2仙，估計全年每股盈利12仙，預測PE僅5.1倍。首國已成為高增長股，以PE7倍計，股價已可見0.84元。
噚日話在高位整固好耐嘅百威國際（718），好快又會再開車，真係話口未完，果然搶咗上去，高收0.28元，成交又大增到1.4億股，聽講好快會有基金進場，初步目標係3字頭，日後成功同河北滄州工業集團及中國石化集團拉上更密切關係後，股價不難在現水平再翻多番。
PE低上升空間大
噚日收到料，話要留意隻五礦資源（1208），噚日收2.275元，升5仙，消息話有機會上番去年注資時大股東食貨價2.86元呢啲位。
五礦母公司係中國五礦，乃內地有色金屬及礦產龍頭企業之一，家吓五礦係佢嘅鋁業上市旗艦，相信日後仍會陸續有注資同併購嘅大動作。五礦05年（12月年結）預期PE唔夠5倍，同中鋁（2600）預期的8倍多比較，股價有好大的上升空間。
郭兆誠