今天是年廿七，官恩娜（Ella）日前到銅鑼灣辦年貨，為迎接狗年做準備。雖然Ella少年時在外國居住，但很重視農曆新年，最喜歡吃團年飯，更愛吃全盒美食。
官恩娜性格雖然鬼妹仔，但她十分重視農曆新年，更喜歡吃賀年食物。日前她到銅鑼灣辦年貨時，第一時間買了大堆瓜子、大白兔糖、金鷹朱古力和芋蝦等應節食品，更一邊拍照一邊吃。
愛大排筵席
Ella說：「我細個時，就算過完年都唔畀屋企人收埋個全盒㗎，頭先買嗰啲都係我最鍾意嘅全盒食物。」她又說年廿九時會行花市趁熱鬧，更會買桃花帶旺桃花運，又提到以往過年，家人都是隨意吃飯當團年，不過她卻喜歡比較傳統的大排筵席，Ella說：「我鍾意成家人一齊食團年飯嘅感覺，聚埋一齊慶祝咁樣好開心。不過，𠵱家大個咗好少節日可以全家慶祝，加上又入咗行，舊年過年因為要做阿Sam（許冠傑）演唱會，都冇得點出去玩。」
盼有代表作
問到狗年願望時，Ella說：「希望今年有代表作啦，以往都係乜都去做，不過周身刀冇張利嘅，再係咁落去我黐線㗎喇，希望今年主力放喺音樂或者電影度啦。我𠵱家好努力練普通話，希望出到國語碟。」
採訪：藍文浩
攝影：陳慧安
場地提供：么鳳士多
