官場老手平叔接任工商及科技局局長新工第二日，就要處理極度敏感、隨時出事嘅港台問題，噚日去立會俾議員質詢，平叔甫開口就話已做足功課，睇晒文件先嚟，不過佢接任新職僅兩日，對檢討公共廣播服務有幾深認識，相信佢心中有數，議員反覆問佢檢討結果會點樣影響港台，佢索性話答唔到，費事繼續追問。
會後有記者同平叔講，睇佢表現好似乜都唔識，已急步離開嘅平叔都即刻停低，沉住氣反問「我乜都唔識？」之後笑笑口離開，跟喺後面嘅一眾官員個個耷低頭忍笑。
上周喺記者會上大出風頭嘅公共廣播服務檢討委員會主席黃應士，噚日面對議員車輪戰表現不過不失，開會前佢同劉慧卿抱拳打招呼，卿姐以前做過記者，算係半個行家，笑笑口窒佢，「吉叔你唔好咁多廢話嘞。」
傳真︰2623-9278
電郵︰[email protected]