港台十大中文金曲頒獎禮前晚頒金曲給《他約我去迪士尼》時，司儀李志剛只宣布得獎歌手是kellyjackie，忽略合唱的陳慧琳（Kelly）。昨日Kelly的fans投訴港台將合唱歌變獨唱歌，周國豐則確定Kelly有份攞獎，相信是因她缺席才沒叫她上台。
香港電台《十大中文金曲頒獎音樂會》前晚圓滿結束，但宣布的賽果卻有爭議之處，事緣《他約我去迪士尼》在候選金曲部份中，列明由陳慧琳和kellyjackie合唱，但當頒獎嘉賓陳易希宣布第五首金曲是《他》後，司儀李志剛卻只宣布主唱人是kellyjackie，完全沒有提及Kelly，合唱歌頓變獨唱歌。
昨日不少Kelly歌迷電郵到本報投訴，指港台賽果不公平，公開投票時列明該曲是合唱，但因Kelly缺席就僅將獎項頒給kellyjackie，歌迷又不滿Kelly在全國最受歡迎女歌手獎三甲不入，十優歌手亦沒有份。
祖兒奪金愕然
頒獎禮製作統籌周國豐昨日在電台說：「我唔記得現場宣布嘅時候係點，可能因為陳慧琳唔喺現場，先冇叫佢個名上台，你睇番場刊同我哋發嘅獲獎名單，都係合唱歌嚟，係有陳慧琳份嘅。至於女歌手獎同十優，我哋係跟番個機制同遊戲規則，唔會因為唔嚟就冇獎，只會係分數唔夠啫。」陳慧琳經理人鍾珍則說：「可能係司儀漏咗啫，最緊要首歌受歡迎。」而Kelly昨日在荃灣出席電影活動時，談及在港台頒獎禮中僅得半個獎，她說：「唔去就冇㗎啦，我噚日有嘢做，最緊要《希望》有人鍾意，我冇所謂。」
奪全國最受歡迎女歌手金獎的容祖兒，前晚領獎時顯得甚愕然，她在後台說：「想出張好嘅國語碟，但都未達到目標，呢兩年都有去內地宣傳，但成績未滿意㗎，攞呢個獎係抬舉咗我，我都諗過自己憑乜呢？可能係內地歌迷支持啩。」
此外，有傳早前政府內部指港台頒獎禮勞民傷財，應留給商營電台舉辦，令港台頒獎禮有停辦可能，前晚劉德華領獎時感觸地說：「唔知今年係咪最後一年，講到好似唔做咁，我都唔理，只想感受吓今晚有幾多掌聲。」但這部份發言沒有直播，助理廣播署長張文新事後說：「應該係咁啱要播十一點新聞先cut咗。」
至於港台頒獎禮是否停辦，張文新說：「冇聽過，今晚睇歌迷同市場嘅反應，係得到大眾支持，有可能再做㗎。」談到不辦慶功宴，張文新說：「公營電台搞起上嚟係難啲，人哋可以有贊助。」
盼長做長有
大贏家陳奕迅說：「我唔希望港台唔搞，有頒獎禮先令樂壇有動力，唔好咁忍心啦。」華仔說：「梗係想港台繼續，我會𠵱家開始懷念，唔會等佢冇咗嗰日先懷念。」
採訪：馬建華、胡比、李珮洳、魯萍
攝影：陳偉權、林德雄、葉君海
