側田出道以來都戴帽示人，昨日有雜誌刊出他除帽後現出M字額及禿頭的照片，林苑亦出現在男方家中。側田昨日在黃柏高陪同下出席記者會，他神情輕鬆地笑指自己似金剛，並已預料一定會有人傷害自己。
新人王側田出道至今一直戴帽示人，令人懷疑他頭上另有乾坤，昨日最新一期《壹本便利》揭開側田除帽後的真面目，拍到他的M字額和禿頭，並指其緋聞女友林苑深夜出現在他家的廚房，兩人均穿上新城勁爆頒獎禮大會T恤。側田昨日在經理人黃柏高、古巨基和楊千嬅陪同下，在尖沙嘴舉行記者會，並發聲明指事件已交由律師處理。
自嘲似足金剛
側田昨日全程表現輕鬆，他說：「其實呢啲唔只喺呢行發生，所有人都應該有種心態，預咗一定有人hurt你，我諗到自己好似KingKong。」此時基仔、千嬅和黃柏高都忍不住笑，側田續說：「當人哋用支槍射你心口，但係子彈好細，射埋心口會自己彈開。我對得住天，冇做錯事，對得住自己，我想做音樂啫，就係咁簡單。」
黃柏高亦力撐說：「我欣賞側田唱歌好同有音樂才華，唔係因為佢嘅外表，外表並唔重要。今日樂壇咁艱難嘅日子，我哋咁難搵到人才，對樂壇有咁大貢獻，唔應該做啲咁傷害性嘅新聞。對雜誌大做文章，全公司藝人都好失望，就報道內出現嘅朋友（林苑），側田有好多朋友，唔只一個，報道亦造成該朋友嘅負面報道。最後，私人屋企範圍隨便入去摷垃圾，將人哋掟出嚟嘅垃圾當係藝人所有，咁係嚴重侵犯藝人私隱。」
記者會短短五分鐘結束，基仔離開前拍一拍側田，以示支持，但側田搞笑地說：「台上有湖南電視台支咪，頭先我講咗廣東話。」身旁的千嬅忍不住笑說：「得啦，唔使理！」當記者追問側田報道有否影響心情時，他爽快地說：「OK，其實我唔應該講嘢，差啲重想答，哈哈！」
林苑：冇拍拖
林苑昨日回應夜會事件說：「我同佢冇拍拖，只係傾心事嘅朋友，佢屋企有錄音室，好多artist都會上去同佢傾點樣寫歌，我都成日上去同佢傾偈。」
採訪：馬建華
攝影：林德雄
